වැලිකඩ බන්ධනාගාර රෝහල් කාර්ය මණ්ඩලය පී.සී.ආර් පරීක්ෂණ වලට
වැලිකඩ බන්ධනාගාර රෝහලේ සහාය සේවා සදහා යොදවා සිටි රැදවියෙකුට කොරෝනා වෛරසය ආසාදනය වීම හේතුවෙන් රෝහලේ සියළු රෝගීන් සහ කාර්ය මණ්ඩලය පී සී ආර් පරීක්ෂණ සදහා යොමු කිරීම අද(11) පෙරවරුවේ ආරම්භ වුණා.
එම රෝහලේ වෛද්‍ය කාර්ය මණ්ඩලය එම පරීක්ෂණ සිදුකරන බවයි බන්ධනාගාර ආරංචි පැවසුවේ. එහි නේවාසිකව ප‍්‍රතිකාර ලබන රෝගීන් සංඛ්‍යාව 175 කට ආසන්න වනවා. රෝහලේ කාර්ය මණ්ඩලයේ 25 දෙනෙකුගේ පමණ ද පී සී ආර් පරීක්ෂණ සිදු කිරීමට නියමිතයි.
වැලිකඩ බන්ධනාගාර රෝහලෙන් වාර්තා වූ කොරෝනා ආසාදිත රැදවියා නේවාසික රෝගීන්ගේ සහ කාර්ය මණ්ඩලයේ කිහිප දෙනෙකුගේ හිස කෙස් සහ රැවුල කැපීමද ඉකුත් දිනවල සිදුකර ඇති බවයි වාර්තා වුණේ.
මීට පෙරද කන්දකාඩු පුනරුත්ථාපන මධ්‍යස්ථානයේ පුනරුත්ථාපනය වී පසුව වැලිකඩ බන්ධනාගාරයට රැගෙන ආ රැදවියෙකුටද කොරෝනා වෛරසය ආසාදනය වී තිබුණා. කන්දකාඩු පුනරුත්ථාපන මධ්‍යස්ථානයෙන් කොරෝනා ආසාදිතයින් වාර්තාවීම ආරම්භ වූයේ ඉන් අනතුරුවයි.
